तार म्हंटलेकी पकवान्न करणाऱ्याला आठवते साखरेच्या पाकाची तार ,
कच्चा -पक्का ,एकतारी -दोनतारी ,कडक -गोळीबंद केवढे ते पाकाचे प्रकार ,
फक्त पुस्तकातून समजत नाही ,अनुभव येई पर्यंत तार ओळखायची कसरतच फार ,
आई कडून मुली कडे ,सासू कडून सुनेकडे आलेला असतो हातर ठेवा ,
अंगठा अन तर्जनीच्या मध्ये ,घेऊन थेंब पाकाचा ,तार बघाया ,तर्जनी नाचवा ,
गोळीबंद पाकासाठी पाण्यात टाकावा पाकाचा थेंब ,तो गोळी बनून टिकायला हवा ,
गुलाबजामला लागे कच्चा पाक ,तना -मनात मुरायला गोडवा ,
लाडूसाठी एकतारी पाकात दोन -तीन तास मुरत ठेवावा खमंग भाजलेला खवा -रवा ,
गूळपापडी ,मोतीचूर ,पाकातील पुऱ्यांना दोनतारीच्या आसपास ठेवा ,
साखरआंब्याला लागे पक्का पाक ,वर्षभर टिकवून ,पाहुणचाराचा गोडवा वाढवा ,
साखरभाताला लागे गोळीबंद पाक ,केशर वेलची ,बदाम बेदाणा ,सुका मेवा ,
कडक चिक्की मध्ये गूळ -साखरेच्या पाकाला ,पाण्याचा थेंबही चालत नाही बुआ ,
वड्यांसाठी मिश्रण गोळा होईस्तोवर घोटावे ,पातेल्याची जमीन दिसे पर्यंत ,गॅस कसा बारिक हवा ,
खादाडी शिवाय आयुष्यात बरेच ठिकाणी ,तारेचा लागतो हातभार --------
चांगल्या -वाईट बातम्या देऊन काळजाचे ठोके वाढवणारी ,पोस्टाची तार ,झालीये आता हद्दपार ,
खेड्या -पाड्यात अजूनही कपडे वाळवायला ,पडदा लावायला ,अडकवायला ,उपयोगी पडते तार ,
वीज वाहून आणणारी ,पक्ष्यांना झुलवणारी तार तर असते एक दुधारी तलवार ,
अंतरीच्या लोकांना भेटवणारी ,टेलिफोनची तार तर ,एक महानच आविष्कार ,
डोंबाऱ्याच्या कुटुंबाचा तार म्हणजे ,जगण्याचा एक भक्कम आधार ,
जीवनात वागताना सर्वांनी ठेवावे 'तारतम्य ',तरच होईल जगताचा उद्धार . ....
कोणत्याही टिप्पण्या नाहीत:
टिप्पणी पोस्ट करा